Temirtaýda balyq aýlaýdan álem chempıonaty ótti

Jalpy, álem chempıonatyn ótkizý quqyǵyna bizdiń el men Bolgarııa básekege túsken bolatyn. Túpkilikti sheshim ótken jyldyń naýryz aıyn­da qabyldanyp, mundaı jarys ótkizýge ınfra­qury­lymy saqadaı-saı Samarqan sý qoımasy ábden laıyq dep tanylǵan edi.

Chempıonat erejesine saı, birinshi kezeńde bes-besten múshesi bar ár komanda balyqty úzilissiz úsh saǵat boıy aýlady. Ekinshi kezeńde de osynsha ýaqyt aýlaý shart boldy. Alǵashqy týr qorytyndysynda pavlodarlyq Erjan Ýahıtov úsh saǵatta 9,5 kılo balyq aýlap, álemdik rekord ornatqan edi. Biraq, eki týr nátıjesi boıynsha Erjan da, bizdiń qurama da úzdik úshtikke ene almady. Jarys qorytyndysynda quramynda Pavel Logvınenko, Erjan Ýahıtov, Dmıtrıı Levıskıı, Tımýr Kovalıov (Pavlodar), Dmıtrıı Elıseev (Qostanaı) jáne Pavel Nezamýtdınov (Almaty) óner kórsetken Qazaqstan komandasy aýlaǵan balyqtyń salmaǵy 41,150 kılo bolyp, olar altynshy oryndy mise tutty. Degenmen, az da bolsa ilgerileý bar. Bizdiń balyqshylar byltyr Latvııada ótken álem chempıonatyn 7-orynmen aıaqtaǵan bolatyn.

Al chempıonatta 48,583 kılo balyq aýlaǵan Re­seı komandasy bas júldeni ıemdendi. Aýlaǵan balyq­tarynyń jalpy salmaǵy 46,313 kılo tartqan Latvııa komandasy ekinshi oryn aldy. Úzdik úshtikti 42,728 kılo balyq ustaǵan Lıtva balyqshylary túıindedi.

Jekeleı synda altyn júlde latvııalyq balyqshyǵa buıyrsa, Reseı ókili kúmis medal ıegeri atandy. Ýkraınalyq sportshy qola júldeni qanaǵat etti. Qazaqstandyqtar arasynan eń úzdik kórsetkishke Pavel Nezamýtdınov qol jetkizdi. Ol 10,168 kılo balyq aýlap, chempıonatty 12-shi orynmen aıaqtady.

Qazaqstan 2009 jyldan beri Tushy sýda balyq aý­laý halyqaralyq federasııasynyń múshesi. Bir ǵana Qaraǵandy oblysynyń ózinde bes myńǵa jýyq sport­shy bar, olar federasııanyń qoldaýymen túrli saıys­tarǵa qatysyp, táýir nátıjelerge qol jetkizip júr. 

Qaırat ÁBILDA, «Egemen Qazaqstan»

Qaraǵandy oblysy, Temirtaý qalasy